27 лістапада Народны літаратурны тэатр “Жывое слова” запрашае на вечарыну ўласнай творчасці “Атрасіны-2025” пад назвай “Валодзя” да 95-годдзя Уладзіміра Караткевіча.

“Людзі, жыццё якіх віравала, спалі ўсяго толькі 4-5 гадзін. Што ж, іхняе жыццё было цікавым, было поўнае барацьбы, подзвігаў, велізарнае працы. Я, на жаль, не магу сябе аднесці да такіх. Жыццё ў мяне самае звычайнае” (Уладзімр Караткевіч).

Кажуць, што гісторыі жывуць у кнігах. Але ёсць адна, якая выходзіць за межы старонак – гісторыя чалавека, што навучыў Беларусь бачыць сябе праз казкі і легенды. Гэта гісторыя Уладзіміра Караткевіча.
Пастаноўка “Валодзя” у межах вечарыны ўласнай творчасці “Атрасіны-2025” –  падарожжа ў яго свет: ад юнацкіх мар да вялікіх кніг, якія сталі часткай гісторыі.

Вечарыну ўласнай творчасці “Атрасіны” ў 2000-х гадах традыцыйна рыхтавалі самі студэнты, пісалі сцэнар, выступалі рэжысёрамі і акцёрамі пастаноўкі.  У той час, калі дрэвы атрасалі лісце, “жываслоўцы” атрасалі ўласныя творчыя здабыткі. Вось і на гэты раз кіраўнікі тэатра Алеся Сівохіна і Алесь Мойскі прызначылі рэжысёрамі “Атрасін” студэнтак 3-га курса філалагічнага факультэта БДПУ  Настассю Адамовіч, Вольгу Сойка і выпускніка БДУ Максіма Гаўрыса. А яны вырашылі звярнуцца да творчасці Уладзімра Караткевіча.

Сёлета “Атрасіны” спалучацца з яшчэ адным праектам тэатра “Клуб творчых дыялогаў”. Пасля пастаноўкі “Валодзя” адбудзецца гутарка з кандыдатам філалагічных навук, дацэнтам Пятром Жаўняровічам – адным з  укладальнікаў збору твораў Уладзіміра Караткевіча. Пётр Пятровіч падзеліцца сваімі адкрыццямі падчас даследаванняў твораў класіка і разважаннямі пра яго значэнне для беларускай літаратуры.

Запрашаем 27 лістапада а 19-й гадзіне ў малую залу БДПУ (вул. Савецкая, 18, корпус № 2, ауд. № 500)

 Уваход вольны.

Расскажи друзьям: Тэатр “Жывое слова” аднаўляе “Атрасіны” да 95-годдзя Уладзіміра Караткевіча