Народны літаратурны тэатр «Жывое слова» працягвае паказваць кампазіцыю «Аб чым маё сэрца» да 140-годдзя з дня нараджэння Якуба Коласа

Пасля святкаванняў юбілею народнага паэта Беларусі ў Дзяржаўным літаратурна-мемарыяльным музеі Якуба Коласа, дзе тэатр «Жывое слова» ўпершыню паказаў кампазіцыю «Аб чым маё сэрца…», калектыў сталі запрашаць розныя ўстановы Мінска.

Аднымі з першых гэта зрабілі супрацоўнікі Бібліятэкі №3 імя У. Маякоўскага г.Мінска, з якімі «жываслоўцаў» звязвае даўняе сяброўства. На гэты раз тэатр паказаў кампазіцыю паводле кнігі «У палескай глушы» з трылогіі Якуба Коласа «На ростанях» і па іншых творах для школьнікаў з мікрараёна Шабаны. Студэнты БДПУ з ліку ўдзельнікаў тэатра пераўвасобіліся ў коласаўскіх персанажаў на імправізаванай сцэне, зачытаўшыся кнігамі класіка. Можна сказаць, што яны сталі з гледачом адным цэлым. Сімвалічна, што школьнікі хутка будуць чытаць творы Якуба Коласа, да вывучэння якіх тэатралы заахвоцілі юных гледачоў.