WI-FIНа пасяджэнні прысутнічалі намеснікі дэканаў факультэтаў і намеснікі дырэктараў інстытутаў па навуковай рабоце, члены Савета маладых вучоных БДПУ і прадстаўнікі Студэнцкага навуковага таварыства.
У пачатку пасяджэння А.І. Жук адзначыў, што ў БДПУ забяспечваецца ўстойлівае планамернае развіццё навукова-даследчай і інавацыйнай дзейнасці, павышаецца яе сацыяльна-эканамічная эфектыўнасць для ўстойлівага развіцця грамадства.
Рэктар падкрэсліў, што разглядаемае пытанне з’яўляецца выключна актуальным у плане перспектыў развіцця ўніверсітэта, паколькі ў сучасных умовах удасканальваць адукацыйны працэс можна толькі на падставе навуковых, эксперыментальных і інавацыйных распрацовак.
З асноўным дакладам выступіла прарэктар па навуковай рабоце Ганна Васільеўна Торхава.
Дакладчык адзначыла, што навукова-даследчая дзейнасць універсітэта арыентавана на навуковую падтрымку ўстойлівага сацыяльна-эканамічнага развіцця Рэспублікі Беларусь. Навукова-даследчыя работы адпаведнай тэматыкі ажыццяўляліся ў рамках дзяржаўных і галіновых праграм, асобных праектаў. У 2021 г. БДПУ прымаў удзел у выкананні 101 навукова-даследчай работы, а таксама галіновай навукова-тэхнічнай праграмы «Функцыянальная граматнасць», 6 дзяржаўных праграм навуковых даследаванняў, якія кардынуюцца НАН Беларусі.
Найбольш актыўна працавалі факультэты – філалагічны, гістарычны, фізіка-матэматычны, прыродазнаўства, дашкольнай адукацыі, Інстытут псіхалогіі, Інстытут інклюзіўнай адукацыі, ЦРПА. Меншую актыўнасць праявілі факультэты эстэтычнай адукацыі, пачатковай адукацыі, фізічнага выхавання.
У рамках праведзеных даследаванняў атрыманы вынікі, якія скіраваны на ўдасканаленне навукова-метадычнага забеспячэння дашкольнай, агульнай сярэдняй, спецыяльнай, педагагічнай адукацыі, сацыяльна-педагагічнай работы ў кантэксце ідэй і каштоўнасцей устойлівага развіцця. Вынікі фундаментальных і прыкладных даследаванняў апрабіраваны і ўкаранёны ў адукацыйны працэс дашкольнай, агульнай сярэдняй, спецыяльнай і педагагічнай адукацыі на эксперыментальных і інавацыйных пляцоўках, базах практык і філіялаў кафедраў.
Асноўныя вынікі даследаванняў вучоных БДПУ знайшлі адлюстраванне ў амаль 2500 навуковых публікацыях (у тым ліку 25 манаграфій, 54 падручнікі і вучэбныя дапаможнікі з грыфам Міністэрства адукацыі, 38 навуковых артыкулах у выданнях, зарэгістраваных у базах Scopus і Web of Science, 372 у часопісах, якія ўваходзяць у пералік ВАК Рэспублікі Беларусь. Па агульнай колькасці публікацый лідзіруе філалагічны факультэт, найбольшая колькасць артыкулаў у часопісах Scopus і Web of Science ‒ у выкладчыкаў факультэта прыродазнаўства.
На базе БДПУ праведзены 23 навуковыя мерапрыемствы, з іх 12 – міжнародныя.
У 2021 г. усе выпускнікі аспірантуры і дактарантуры паспяхова прайшлі выніковую атэстацыю. Адбылося 10 абарон кандыдацкіх і доктарскіх дысертацый работнікамі БДПУ. 4 аспіранты і саіскальнікі абаранілі дысертацыі ва ўстаноўлены перыяд навучання (В.М.Лухверчык, Д.М.Печка, А.В.Тучынскі – па філалогіі, А.А.Сурма – па гісторыі).
У працы 47 СНДЛ удзельнічалі звыш 800 студэнтаў, магістрантаў і аспірантаў, вучняў устаноў агульнай сярэдняй адукацыі.
На XXVIII Рэспубліканскім конкурсе навуковых работ студэнтаў 84 з 92 удзельнікаў атрымалі прызавыя катэгорыі. Найлепшыя студэнты БДПУ ўдастоены розных узнагарод Спецыяльнага фонду Прэзідэнта Рэспублікі Беларусь па сацыяльнай падтрымцы адораных навучэнцаў і студэнтаў (24 студэнты атрымалі 16 стыпендый і 8 прэмій).
Савет адзначыў, што навуковыя праекты ў БДПУ выконваюцца ў поўным аб’ёме, расце колькасць уключаных у НДР студэнтаў, магістрантаў, аспірантаў. Істотна павялічыліся паказчыкі ўкаранення вынікаў НДР.
Па выніках пасяджэння была прынята пастанова Савета ўніверсітэта, у якой вызначаны канкрэтныя задачы па далейшым развіцці навукова-даследчай, эксперыментальнай і інавацыйнай дзейнасці БДПУ. Поўны тэкст пастановы будзе накіраваны ва ўсе структурныя падраздзяленні ўніверсітэта.
