WI-FIЗ дакладам выступіў начальнік студэнцкага гарадка Леанід Сяргеевіч Пепік. Дакладчык адзначыў, што студэнцкім гарадком праводзіцца сістэмная праца па рацыянальным выкарыстанні інтэрнатаў, ствараюцца неабходныя ўмовы для пражывання, выхавання і фарміравання здаровага ладу жыцця будучых педагогаў.
Студэнцкі гарадок аб’ядноўвае 8 інтэрнатаў, якія разлічаны больш чым на 3650 месцаў.
Важным напрамкам дзейнасці студгарадка з’яўляецца ідэалагічная і выхаваўчая работа. Ва ўсіх інтэрнатах аформлены куткі дзяржаўнай і ўніверсітэцкай сімволікі, рэгулярна абнаўляюцца інфармацыйныя стэнды. Праводзяцца дыялогавыя пляцоўкі, круглыя сталы, тэматычныя сустрэчы студэнтаў з выкладчыкамі кафедраў, прадстаўнікамі дзяржаўных органаў кіравання і грамадскімі дзеячамі.
Асаблівая ўвага надаецца фарміраванню ў навучэнцаў грамадзянска-патрыятычных каштоўнасцей. У інтэрнатах праведзены цыклы мерапрыемстваў у рамках Года малой радзімы: пазнавальная гульня “Гісторыя маёй краіны”, віктарына “Адкуль я родам?”, квэст-гульня “Адзінства: вы пад знакам народнага адзінства”, акцыя “Краіна, дзе пашчасціла нарадзіцца”. Студэнты БДПУ, якія пражываюць у інтэрнатах, прынялі актыўны ўдзел у спартыўна-творчым фестывалі “Мы разам” у рамках Года народнага адзінства. У Год гістарычнай памяці прайшлі мерапрыемствы “Ганаруся Беларуссю!”, акцыя-віктарына “Ад прадзедаў спакон вякоў мне засталася спадчына” і інш. Штогод праводзяцца мерапрыемствы да Дня Перамогі.
У ідэалагічнай і выхаваўчай рабоце студгарадка важную ролю адыгрывае студэнцкае самакіраванне і маладзёжныя грамадскія арганізацыі. У кожным інтэрнаце дзейнічае студэнцкі савет, які сумесна з адміністрацыяй займаецца кантролем за захаваннем санітарнага стану пакояў і месцаў агульнага карыстання, прафілактыкай парушэнняў правіл пражывання ў інтэрнатах, арганізацыяй культурна-масавых і фізкультурна-аздараўленчых мерапрыемстваў, інфармацыйнай працай.
Педагагічны калектыў студэнцкага гарадка надае вялікую ўвагу прававому выхаванню навучэнцаў і прафілактыцы правапарушэнняў. Пастаянна праводзіцца тлумачальная работа па выкананні правіл пражывання ў інтэрнатах БДПУ, арганізуюцца сустрэчы студэнтаў з работнікамі праваахоўных органаў і МНС па пытаннях прафілактыкі правапарушэнняў у маладзёжным асяроддзі і пажарнай бяспекі.
Вынікам эфектыўнай прафілактычнай работы з навучэнцамі, якія пражываюць у інтэрнатах, з’яўляецца зніжэнне колькасці правапарушэнняў з 34 у 2019 / 2020 н. г. да 3 у 2022 / 2023 н. г.
Важным напрамкам працы са студэнцкай моладдзю з’яўляецца далучэнне студэнтаў да дзейнасці клубаў і гурткоў. На базе інтэрнатаў працуюць 18 клубных фарміраванняў рознай скіраванасці, 17 спартыўных секцый. У інтэрнатах маецца 5 трэнажорных залаў і 11 памяшканняў, прыстасаваных для заняткаў спортам. З мэтай арганізацыі актыўнага адпачынку і вольнага часу навучэнцаў з 2022 г. адноўлена правядзенне спартакіяды сярод каманд інтэрнатаў студэнцкага гарадка.
Рэктаратам праводзіцца пастаянная праца па паляпшэнні матэрыяльна-тэхнічнай базы інтэрнатаў і забеспячэнні бягучых рамонтных работ: адрамантаваны пакоі самападрыхтоўкі, BSPU HALL, сталовай, праведзены рамонт інтэрната № 3 (96 пакояў, калідоры, лесвічныя маршы, кухні) і інш. Інтэрнаты студэнцкага гарадка неаднаразова станавіліся прызёрамі аглядаў-конкурсаў на лепшае азеляненне і кветкавае афармленне тэрыторый.
Ульяна Артураўна Мілашэўская, студэнтка гістарычнага факультэта, старшыня прафкама студэнтаў факультэта, паведаміла пра асаблівасці арганізацыі культурна-масавых, фізкультурна-аздараўленчых мерапрыемстваў, інфармацыйнай працы ў студгарадку, а таксама падзякавала рэктарату за стварэнне якасных умоў для жыцця, вучобы і творчасці студэнтаў.
Па выніках пасяджэння прынята пастанова Савета ўніверсітэта, поўны тэкст якой будзе накіраваны ва ўсе структурныя падраздзяленні.
