WI-FIНа пасяджэнні прысутнічалі намеснікі дэканаў факультэтаў і намеснікі дырэктараў інстытутаў па навуковай рабоце, загадчыкі кафедраў, прадстаўнікі Савета маладых вучоных і Студэнцкага навуковага таварыства.
У пачатку пасяджэння А.І. Жук адзначыў, што навуковая, навукова-тэхнічная і інавацыйная дзейнасць БДПУ накіравана на нарошчванне навукова-даследчага патэнцыялу ўніверсітэта як вядучай ВНУ ў сферы бесперапыннай педагагічнай адукацыі, забеспячэнне апераджальнай падрыхтоўкі, павышэння кваліфікацыі і перападрыхтоўкі педагагічных работнікаў і ўстойлівага развіцця нацыянальнай сістэмы адукацыі.
З асноўным дакладам выступіла прарэктар па навуковай рабоце Аляксандра Валянцінаўна Позняк, якая адзначыла два найбольш істотныя дасягненні ўніверсітэта ў 2022 г.: паспяховую акрэдытацыю БДПУ як навуковай арганізацыі да 2027 г.; распрацоўку стратэгіі навуковай, навукова-тэхнічнай і інавацыйнай дзейнасці БДПУ да 2025 г., зацверджаную Міністэрствам адукацыі.
Прафесарска-выкладчыцкі склад і навуковыя супрацоўнікі паспяхова ўдзельнічалі ў выкананні 99 НДР. Найбольш актыўна працавалі філалагічны факультэт, Інстытут інклюзіўнай адукацыі, фізіка-матэматычны і гістарычны факультэты, факультэт прыродазнаўства, Інстытут псіхалогіі, факультэт пачатковай адукацыі.
Даследчыкі БДПУ прымалі ўдзел у выкананні ГНТП «Функцыянальная граматнасць» (9 НДР) і 6 дзяржаўных праграм навуковых даследаванняў, каардынуемых НАН Беларусі. Пры падтрымцы БРФФД выконваліся 6 навуковых праектаў. Распрацоўваліся 9 НДР, накіраваных на забеспячэнне дзейнасці Міністэрства адукацыі.
Вынікі фундаментальных і прыкладных даследаванняў апрабіруюцца і ўкараняюцца ў адукацыйны працэс дашкольнай, агульнай сярэдняй, спецыяльнай і педагагічнай адукацыі. У 2022 г. пад кіраўніцтвам супрацоўнікаў БДПУ рэалізоўваліся 12 рэспубліканскіх эксперыментальных і 10 рэспубліканскіх інавацыйных праектаў.
У адукацыйны працэс і сацыяльную сферу былі ўкаранёны амаль 590 распрацовак, пацверджаных актамі аб укараненні ў БДПУ і ў іншых установах адукацыі.
Па выніках удзелу ў конкурсах на саісканне стыпендый Прэзідэнта Рэспублікі Беларусь аспірантам і таленавітым маладым вучоным у 2022 г. прэзідэнцкая стыпендыя была прызначана аспіранту Ю.В.Рогавай (кафедра мовазнаўства і лінгвадыдактыкі, навуковы кіраўнік В.Д.Старычонак).
Уладальнікамі грантаў Міністэрства адукацыі Рэспублікі Беларусь на выкананне НДР дактарантамі, аспірантамі, саіскальнікамі і студэнтамі на 2022 г. сталі 1 дактарант і 4 аспіранты.
На працягу мінулага года адбылося 10 абарон кандыдацкіх і доктарскіх дысертацый работнікамі БДПУ. 3 чалавекі абаранілі кандыдацкія дысертацыі ва ўстаноўлены перыяд навучання.
У БДПУ працуюць 47 СНДЛ, якія аб’ядноўваюць звыш 700 студэнтаў, магістрантаў і аспірантаў, навучэнцаў устаноў агульнай сярэдняй адукацыі. Грантавую падтрымку Міністэрства адукацыі атрымалі СНДЛ Інстытута інклюзіўнай адукацыі, факультэта прыродазнаўства, фізіка-матэматычнага і філалагічнага факультэтаў.
90 навуковых работ навучэнцаў БДПУ былі заяўлены на XXIX Рэспубліканскі конкурс навуковых работ студэнтаў. Прызавыя катэгорыі атрымалі 83 работы, у тым ліку 1 катэгорыю ‒ 20 работ, 2 катэгорыю ‒ 29, 3 катэгорыю ‒ 31; звання лаўрэата ўдастоены 3 навуковыя работы.
Узнагароды Спецыяльнага фонду Прэзідэнта Рэспублікі Беларусь па сацыяльнай падтрымцы адораных навучэнцаў і студэнтаў атрымалі 12 студэнтаў (7 стыпендый і 5 прэмій).
Па выніках пасяджэння была прынята пастанова Савета ўніверсітэта, у якой вызначаны канкрэтныя задачы па далейшым развіцці навукова-даследчай, эксперыментальнай і інавацыйнай дзейнасці БДПУ ў адпаведнасці з асноўнымі прыярытэтамі:
1) адпаведнасць навуковай, навукова-тэхнічнай і інавацыйнай дзейнасці інтарэсам гуманітарнай бяспекі беларускага грамадства і дзяржавы;
2) накіраванасць навуковай дзейнасці на павышэнне якасці падрыхтоўкі педагагічных работнікаў у сістэме бесперапыннай педагагічнай адукацыі;
3) арыентацыя вынікаў навуковай, навукова-тэхнічнай і інавацыйнай дзейнасці на ажыццяўленне сацыякультурнай місіі БДПУ як цэнтра кластарнага развіцця бесперапыннай педагагічнай адукацыі.
Поўны тэкст пастановы будзе накіраваны ва ўсе структурныя падраздзяленні ўніверсітэта.
