WI-FIНа пасяджэнні з дакладам выступіў прарэктар па вучэбнай рабоце Аляксандр Васільевіч Макоўчык. Ён адзначыў, што інстытутамі, факультэтамі і кафедрамі праводзіцца планамерная і эфектыўная работа па ўдасканаленні прафесійнай падрыхтоўкі будучых педагогаў.
Падрыхтоўку спецыялістаў па адукацыйных праграмах вышэйшай адукацыі ў наступным навучальным годзе будуць ажыццяўляць 36 кафедраў, дзе працуюць каля 530 выкладчыкаў, у тым ліку 29 дактароў навук, прафесараў і 226 кандыдатаў навук, дацэнтаў. Лідарам па колькасці выкладчыкаў з вучонымі ступенямі і вучонымі званнямі з’яўляюцца гістарычны, філалагічны і фізіка-матэматычны факультэты. Найбольшы працэнт выкладчыкаў з вышэйшай навуковай кваліфікацыяй – на кафедры мовазнаўства і лінгвадыдактыкі (100%).
Для ажыццяўлення адукацыйнага працэсу ў 2024 / 2025 навучальным годзе за кафедрамі замацаваны 1747 дысцыплін, з іх 1264 – вучэбныя, 54 – факультатыўныя, 8 дысцыплін дадатковых відаў адукацыі і 421 дысцыпліна па выбары.
Для арганізацыі самастойнай работы студэнтаў актыўна вядзецца работа па стварэнні і рэгістрацыі ЭВМК (ІЭВМК) па вучэбных дысцыплінах. Найбольшы працэнт забяспечанасці вучэбных дысцыплін ЭВМК (ІЭВМК) на факультэтах прыродазнаўства, дашкольнай адукацыі і гістарычным – звыш 80%.
У 2024 / 2025 навучальным годзе адукацыйны працэс будзе арганізаваны па 64 спецыяльнасцях. У завочнай форме атрымання адукацыі працягнецца падрыхтоўка па адукацыйнай праграме бакалаўрыяту, інтэграванай з адукацыйнымі праграмамі сярэдняй спецыяльнай адукацыі, па 4 спецыяльнасцях.
Будзе працягнута рэалізацыя сумесных адукацыйных праграм з Ташкенцкім дзяржаўным педагагічным універсітэтам імя Нізамі (Узбекістан), Джызакскім дзяржаўным педагагічным інстытутам імя А.Кадыры (Узбекістан) і Лаянскім педагагічным універсітэтам (КНР), а таксама адкрыта падрыхтоўка па эксперыментальных вучэбных планах магістратуры з універсітэтамі Казахстана: Універсітэтам імя Коркыт Ата і Карагандзінскім універсітэтам імя акадэміка Я.А.Букетава. Запланавана падрыхтоўка па 6 адукацыйных праграмах на англійскай мове.
Адно з адрозненняў будучага навучальнага года – правядзенне дзяржаўнага экзамену ў форме абароны дыпломнай работы.
У якасці баз практык запланаваны амаль 550 устаноў адукацыі г. Мінска (установы агульнай сярэдняй адукацыі, у якіх функцыянуюць педагагічныя класы, і ўстановы адукацыі, на базе якіх створаны філіялы кафедраў БДПУ).
Па выніках пасяджэння прынята пастанова Савета ўніверсітэта, поўны тэкст якой будзе накіраваны ва ўсе структурныя падраздзяленні БДПУ.
