WI-FIЗ дакладамі перад членамі Савета выступілі дэкан факультэта фізічнага выхавання Кірыл Юр’евіч Раманаў і начальнік спартыўнага клуба “Педагог” Іван Рыгоравіч Моргун.
Падчас выступленняў было адзначана, што спартыўна-масавая работа ва ўніверсітэце ажыццяўляецца ў адпаведнасці з рэспубліканскімі і лакальнымі нарматыўнымі прававымі актамі. Усе спартыўныя аб’екты БДПУ выкарыстоўваюцца для правядзення вучэбных і вучэбна-трэніровачных заняткаў, спаборніцтваў, спартыўна-масавых мерапрыемстваў, а таксама для аказання фізкультурна-аздараўленчых паслуг.
Факультэт фізічнага выхавання валодае неабходным кадравым патэнцыялам для забеспячэння адукацыйнага працэсу. Прафесарска-выкладчыцкі склад налічвае 2 дактароў навук, прафесараў, 19 кандыдатаў навук, дацэнтаў, а таксама звыш 30 майстроў спорту, кандыдатаў у майстры спорту, суддзяў міжнароднай і нацыянальнай катэгорый, заслужаных трэнераў.
Па словах К.Ю.Раманава, асаблівая ўвага ва ўніверсітэце надаецца стварэнню матывуючага фізкультурна-аздараўленчага і спартыўнага асяроддзя, скіраванага на ўмацаванне здароўя студэнцкай моладзі, прапаганду здаровага ладу жыцця, павышэнне ўзроўню фізічнай падрыхтоўкі студэнтаў і развіццё студэнцкага спорту.
Штогод спартыўны клуб “Педагог” і факультэт фізічнага выхавання праводзяць больш за 50 спартыўных мерапрыемстваў і спаборніцтваў. Найбольш значным з іх з’яўляецца Круглагадовая спартакіяда студэнтаў БДПУ, якая мае статус першага этапу Рэспубліканскай універсіяды. У яе праграму ўваходзяць 12 відаў спорту, што ўключаюць 19 спартыўных дысцыплін. Кожны год у спаборніцтвах спартакіяды ўдзельнічаюць больш за 800 чалавек.
З мэтай арганізацыі актыўнага адпачынку і здаровага правядзення вольнага часу па месцы жыхарства навучэнцаў праводзіцца таксама спартакіяда сярод інтэрнатаў студэнцкага гарадка па 12 спартыўных дысцыплінах. У ёй бяруць удзел больш за 200 чалавек.
На факультэце фізічнага выхавання вядзецца і належная прафарыентацыйная работа. Яна ўключае Зорныя паходы, экскурсіі і Дні адчыненых дзвярэй для школьнікаў, прафарыентацыйныя сустрэчы і спартыўныя мерапрыемствы, работу ў межах рэспубліканскай алімпіяды па фізічнай культуры і здароўі, а таксама ўзаемадзеянне з вучылішчамі алімпійскага рэзерву, дзіцяча-юнацкімі спартыўнымі школамі і іншымі арганізацыямі спартыўнага профілю.
Студэнты актыўна ўдзельнічаюць ў розных спартыўна-масавых мерапрыемствах па развіцці і папулярызацыі спорту і здаровага ладу жыцця. Многія праекты (спартыўна-адукацыйны праект “Беларусіяда”, спартыўныя святы “Трыумф”, “Дзень здароўя”, спаборніцтвы па плаванні “Стартуем разам!”, спартландыя для студэнтаў 1-га курса “Першы трыумф” і інш.) сталі брэндам БДПУ і служаць развіццю карпаратыўнага духу сярод студэнтаў і выкладчыкаў універсітэта.
Пастанова Савета ўніверсітэта будзе накіравана ва ўсе структурныя падраздзяленні для арганізацыі далейшай работы.
