WI-FIВасіль Васільевіч Зуёнак вядомы шырокай чытацкай аўдыторыі найперш як паэт. Яго вершы ўключаны ў праграму школьнага курса беларускай літаратуры, паэтычны набытак (вершы і ліра-эпас «Пяцірэчча») вывучаецца на філалагічных факультэтах ВНУ. У новай кнізе «Паўстанак з літарай «Л», якая зусім нядаўна выйшла ў выдавецтве «Чатыры чвэрці», выяўляецца іншая грань мастакоўскага таленту – празаічная.
Студэнты-трэцякурснікі, кіраўніцтва і выкладчыкі філфака, а таксама сябры факультэта з Інстытута літаратуразнаўства імя Янкі Купалы Нацыянальнай акадэміі навук Беларусі мелі магчымасць не толькі ўзяць аўтограф у аднаго з найбольш вопытных творцаў (летась Васіль Зуёнак адзначыў 85-годдзе), але і паразмаўляць з майстрам беларускага слова. Васіль Васільевіч расказаў пра няпросты шлях яго новай кнігі да чытача, укладальніцай якой стала дацэнт кафедры беларускай і замежнай літаратуры БДПУ Наталля Віктараўна Заяц. Шаноўны госць падзяліўся глыбокімі разважаннямі пра значнасць і каштоўнасць Кнігі у нашу тэхналагічную эпоху, пачытаў верш «Студэнцкі чамадан». Напісаны ў далёкім 1955 годзе, у час юнацтва пісьменніка, гэты твор узрушыў слухачоў сваёй пазнавальнасцю: клопаты і адчуванні юнака-філфакаўца сярэдзіны ХХ стагоддзя аказаліся вельмі сугучнымі і блізкімі сённяшнім студэнтам.
Са словамі падзякі да пісьменніка за шматгранную творчаць звярнуўся яго зямляк – дэкан філалагічнага факультэта прафесар Васіль Дзянісавіч Старычонак. Як чытач і навуковец, ён падзяліўся сваімі назіраннямі пра адметнасць твораў Васіля Зуёнка, адзначыў іх глыбокую метафарчнасць і філасофскі патэнцыял, расказаў пра выкарыстанне зуёнкаўскіх тэкстаў ва ўласных даследаваннях.
Думаецца, аўтограф аўтара на кнізе празаічных элегій «Паўстанак з літарай «Л» будзе і праз гады нагадваць пра эмацыйную сустрэчу з цудоўным чалавекам і выдатным пісьменнікам – Васілём Зуёнкам.
