Тыдзень жывога слова арганізавалі ўдзельнікі літаратурнага тэатра

Зімой да Дня роднай мовы тэатр «Жывое слова» падрыхтаваў адмысловую канцэртную праграму, з якой працягвае і вясной выступаць у школах, музеях і бібліятэках горада Мінска.

Настаўнікі сталічнай школы далучаюць вучняў да беларускай мовы, літаратуры, культуры, мастацтва і кнігі ўвогуле, таму штогод ладзяць сапраўдны тыдзень роднай мовы. Школьнікі прызвычаіліся бачыць у сваёй актавай зале многіх беларускіх артыстаў, музыкаў і радыёвядучых, таму здзівіць іх было складана.

Аднак жываслоўцам гэта ўдалося. У новую канцэртную праграму яны ўключылі шэраг нумароў, у якіх дэбютавалі студэнты першага курса. Адным з такіх канцэртных нумароў стала харавое чытанне, за якое тэатр Андрэя Каляды ў 1977 годзе атрымаў званне «народны калектыў». Праз 40 гадоў цяперашнім студэнтам удалося пацвердзіць гэтае званне і аднавіць прыём харавога чытання, пра які многія ўжо забыліся. Для чытання хорам быў абраны верш «Страцім-лебедзь» Максіма Багдановіча, 100 гадоў са дня смерці якога здарыцца ў маі гэтага года. Жываслоўцы ўшанавалі памяць пра вялікага паэта і даказалі, што Максімавы нашчадкі ёсць у Беларусі і іх многа.

– Акрамя канцэртнага выступлення, намі была праведзена прафарыентацыя. Падчас сустрэчы з выпускнікамі 69-й школы мы запрасілі іх паступаць у БДПУ, расказалі пра навуковую і вучэбную дзейнасць ва ўніверсітэце, пра спартыўнае і творчае студэнцкае жыццё, – расказала мастацкі кіраўнік тэатра Алеся Сівохіна.

– Мы пачулі шмат прыемных слоў у наш адрас і адрас любімага ўніверсітэта, таму можна сказаць, што ў школе адбыўся не проста тыдзень роднай мовы, а тыдзень жывога слова, тыдзень БДПУ, – дадаў яшчэ адзін з кіраўнікоў «Жывога слова» Алесь Мойскі.

 Дарэчы, наступны раз тэатр пакажа «Страцім-лебедзя» для выкладчыкаў і студэнтаў БДПУ падчас канцэрта «Вялікая сцэна» 20 красавіка а 16-й гадзіне ў актавай зале.