«Жывое слова» - сапраўды народнае!

23 сакавіка 2017 года народны літаратурны тэатр “Жывое слова” пацвердзіў ганаровае найменне “народны калектыў”.

У межах Мінскага гарадскога фестывалю народнай творчасці «Сузор'е» 2016-2017 гг. тэатрам “Жывое слова” быў паказаны спектакль “Дудар”. Гэты твор сцэнічнага мастацтва ўяўляе сабой дакументальную фантазію, заснаваную на гістарычных фактах з культурнага жыцця беларусаў пачатку ХХ ст., успамінах, публіцыстыцы і мастацкіх творах Сяргея Палуяна, алюзіях і рэмінісцэнцыях Вацлава Ластоўскага, Франца Кафкі, Хорхе Луіса Борхеса.

Прэм’ера спектакля “Дудар” адбылася 5 лістапада 2016 года і была прымеркавана да 50-годдзя творчай дзейнасці калектыву.

Усе члены журы (дацэнт кафедры тэатральнагай творчасці факультэта традыцыйнай бларускай культуры і сучаснага мастацтва БДУКМ А.М. Акулёнак; дацэнт кафедры рэжысуры абрадаў і святаў БДУКМ, рэжысёр-пастаноўшчык А.Я.Камінскі; сцэнограф, мастак, рэстаўратар, дызайнер, член саюза архітэктараў Д.М. Мохаў і інш.) адзінагалосна выказаліся, што тэатр “Жывое слова” годна пацвердзіў найменне “народны”. Яны адзначылі высокі ўзровень падрыхтоўкі студэнтаў, якія займаюцца тэатральнай дзейнасцю непрафесійна, але дасягнулі значных поспехаў у валоданні голасам і беларускай мовай, да якой цягнуцца і шчыра паважаюць. Прычынай таму былі названыя цудоўныя традыцыі “Жывога слова” яшчэ з часоў работы ў тэатры Андрэя Андрэевіча Каляды, пры якім калектыў упершыню атрымаў найменне (адбылося гэта 40 гадоў таму – у 1977 годзе). Пасля прагляду спектакля “Дудар” было адзначана вялікае значэнне работы над нацыянальным матэрылам, чаго не хапае сёння нават прафесійным тэатрам. Журы падкрэсліла для сябе арыгінальныя рэжысёрскія хады ў спектаклі і самастойнасць кіраўнікоў тэатра Алесі Сівохінай і Алеся Мойскага ў рабоце над сцэнарыем. Са слоў прафесіяналаў у сваёй справе, такі стыль яны з задавальненнем паставілі б і са сваімі студэнтамі-акцёрамі ў Беларускім дзяржаўным універсітэце культуры і мастацтваў.

- Арыгінальны сінтэз драматычнага тэатра з тэатрам лялек і цяней у спектаклі “Дудар” дазваляе разлічваць на ўзнагароды як на фестывале “Сузор’е”, так і на іншых конкурсах і тэатральных форумах, - адзначыла камісія.

Нагадаем, што канчатковыя вынікі прагляду народных і ўзорных тэатральных калектываў у межах Мінскага гарадскога фестывалю народнай творчасці “Сузор'е” будуць вядомыя на прыканцы красавіка бягучага года.