Нарадзілася ў Мінску ў сям’і служачых.
У 1997 г. закончыла з адзнакай Беларускі дзяржаўны педагагічны ўніверсітэт імя Максіма Танка (спецыяльнасць “Беларуская мова і літаратура, сусветная і айчынная культура”), атрымала акадэмічную ступень бакалаўра ў галіне педагагічных навук. У 1997 г. паступіла ў аспірантуру БДПУ імя Максіма Танка. Працавала настаўніцай беларускай мовы і літаратуры ў СШ № 155 і 67 г. Мінска (1995–1998), асістэнтам кафедры беларускай літаратуры (2004–2005), старшым навуковым супрацоўнікам Нацыянальнага інстытута адукацыі Міністэрства адукацыі Рэспублікі Беларусь, дацэнтам кафедры беларускай літаратуры (2008–2011), загадчыкам кафедры беларускай літаратуры і культуры (з 2011 г.). Кандыдат філалагічных навук (2004, тэма дысертацыі “Жанрава-стылявая спецыфіка творчасці Анатоля Вярцінскага і Янкі Сіпакова”), дацэнт (2010), узнагароджана граматай Міністэрства адукацыі Рэспублікі Беларусь. Навуковы кіраўнік тэм “Электронны вучэбна-метадычны комплекс “Беларуская літаратура. 11 клас””, “Беларуская і сусветная літаратура ў сістэме міжкультурных камунікацый”. Арганізавала міжнародныя навуковыя канферэнцыі: “Мастацкі свет Максіма Багдановіча: адметнасць, шматграннасць, універсальнасць” (2011); “Танкаўскія чытанні” (2012, 2014), “Беларусь на скрыжаванні стагоддзяў: ад класікі да сучаснасці” (2012) і інш.
І.М. Гоўзіч па выніках 2014–2015 н.г. за асабісты ўклад у развіццё здольнасцей адораных вучняў і студэнтаў была ўзнагароджана прэміяй Спецыяльнага фонду Прэзідэнта Рэспублікі Беларусь па сацыяльнай падтрымцы здольных навучэнцаў і студэнтаў.

Навуковыя інтарэсы: гісторыя беларускай і рускай літаратур (ХХ–ХХІ стагоддзі), рускамоўная літаратура Беларусі, методыка выкладання беларускай і рускай літаратур.