18 мая 2019 года на галоўным стадыёне горада Мар’іна Горка (Пухавіцкі раён, Мінская вобласць) пройдуць фінальныя спаборніцтвы спартыўна-адукацыйнага праекта БДПУ «Беларусіяда» сярод каманд усіх устаноў агульнай сярэдняй адукацыі Пухавіцкага раёна.

– Толькі ў паўфінальных гульнях, што праходзілі ў розных установах адукацыі Пухаўшчыны з канца лютага па сярэдзіну мая, узялі ўдзел 26 каманд школьнікаў, – расказаў прэс-службе БДПУ дэкан факультэта фізічнага выхавання Аляксандр Мікалаевіч Каспяровіч. – У фінале згуляюць 12 каманд (а гэта больш за 100 школьнікаў) – па 3 каманды-пераможцы кожнай беларускай народнай гульні, уключанай у праграму праекта.

«Беларусіяда» ўяўляе сабой спаборніцтвы па беларускіх народных рухомых гульнях, выбраных па прынцыпах беларускіх традыцый, распаўсюджанасці па рэгіёнах, відовішчнасці. У сёлетнюю праграму «Беларусіяды» на Пухаўшчыне трапілі «Лапта» – актыўная і захапляльная гульня на спрытнасць і кіданне ў цэль, «Дзень-ноч» – спаборніцтва на хуткасць, «Пальчатка» – гульня-стратэгія на вытрымку і хуткасць, «Перацяжкі» – сілавое спаборніцтва з традыцыйнымі правіламі.

– Ужо восьмы год запар падрыхтоўка і правядзенне спабоніцтваў сярод студэнтаў і школьнікаў у межах праекта «Беларусіяда» з’яўляецца адным з практычных заданняў заліку і экзамену студэнтаў, якія навучаюцца на факультэце фізічнага выхавання па спецыяльнасці «Спартыўна-педагагічная дзейнасць (спартыўная рэжысура)». Так што «Беларусіяда» –  не толькі цікавы фізкультурна-аздараўленчы праект БДПУ, але і своеасаблівая творчая лабараторыя, дзе будучыя спартыўныя рэжысёры вучацца і на практыцы спасцігаюць методыку арганізацыі масавых спартыўна-мастацкіх прадстаўленняў, – адзначыў аўтар праекта «Беларусіяда», старшы выкладчык кафедры тэорыі і методыкі фізічнай культуры Анатоль Віктаравіч Дрыгін.

Фінальныя гульні спартыўна-адукацыйнага праекта БДПУ сярод каманд устаноў агульнай сярэдняй адукацыі Пухавіцкага раёна пройдуць на стадыёне Гарадскім па адрасе: г. Мар’іна Горка, вул. Стадыённая, 4. Пачатак – а 10-й гадзіне.

Даведка:

Спартыўна-адукацыйны праект БДПУ «Беларусіяда» актыўна пашырае свае межы. У маі 2017 года на стадыёне БДПУ за права быць лепшымі змагаліся каманды з устаноў адукацыі ўсіх раёнаў горада Мінска. У кастрычніку 2017 года «Беларусіяда» праводзілася ў горадзе Жодзіна (Мінская вобласць).

Расскажи друзьям: Фінальныя спаборніцтвы спартыўна-адукацыйнага праекта БДПУ «Беларусіяда» сярод школьнікаў Пухаўшчыны