26 сакавіка 2022 года, напярэдадні Сусветнага дня тэатра Народны літаратурны тэатр «Жывое слова» прапануе гледачам беларускамоўную перапрацоўку п’есы Яўгена Шварца «Цень». Гэты спектакль будзе паказаны да 55-гадовага юбілею калектыву, які адбыўся яшчэ ў лістападзе мінулага года, але праз эпідэміялагічную сітуацыю святкаванне перанеслася на вясну 2022 года.

Сёлета «жываслоўцы» ўжо паспелі паказаць юбілейныя канцэрты ў шэрагу ўстаноў – школах, музеях, бібліятэках і каледжах горада Мінска. А ў красавіку споўніцца 45 гадоў, як тэатр атрымаў званне «народны» у 1977 годзе. Гэта добрая нагода для сустрэчы выпускнікоў тэатра розных пакаленняў, якіх кіраўнікі «Жывога слова» Алеся Сівохіна і Алесь Мойскі запрасілі 26 сакавіка на паказ спектакля «Цень» паводле п’есы Яўгена Шварца.

 Нагадаем, што таэтр «Жывое слова» быў створаны ў 1966 годзе на філалагічным факультэце Мінскага дзяржаўнага педагагічнага інстытута імя А.М. Горкага былым акцёрам Нацыянальнага акадэмічнага тэатра імя Янкі Купалы, выкладчыкам педінстытута і акадэміі мастацтваў Андрэем Калядой, а сёння ён аб’ядноўвае студэнтаў самых розных факультэтаў БДПУ. Традыцыі, закладзеныя Андрэем Андрэевічам зберагалі і развівалі яго прыемнікі: Юрась і Алена Чарэнкі, Наталля Кухарава і Уладзімір Трапянок. З 2012 года тэатрам кіруюць Алеся Сівохіна і Алесь Мойскі.  

За апошняе дзесяцігоддзе тэатрам былі пастаўлены спектаклі паводле твораў У. Караткевіча («Афарызм»), Р. Брэдберы («Злавіць будучыню»), С. Палуяна, В. Ластоўскага, Х.-Л. Борхеса і інш. («Дудар»), У. Караткевіча і Р. Брэдберы («Вецер») і Я. Шварца («Цень»). Апошні са згаданых спектакляў тэатр «Жывое слова» прапануе паглядзець у абноўленым складзе здзельнікаў ў малой зале БДПУ 26 сакавіка.

 Калi казка можа стаць рэальнасцю, але зусiм не такой, як намалявана ў дзiцячых кнiгах... Калi адзiная магчымасць выйсцi з гульнi – давесцi партыю да канца... Калi здрада можа прывесцi да агульнай мэты, а спроба ахвяраваць сабой абернецца супраць усiх... Спектаклем «Цень» тэатр «Жывое слова» працягвае постмадэрнiстычныя гульнi з тэкстам. I калi на Андэрсана паўплывалi работы нямецкага вучонага i пiсьменнiка Шамiса, а Шварц пакiнуў толькi алюзii i рэмiнiсцэнцыi на творы дацкага казачніка, то спектакль «Цень» – гэта беларуская перапрацоўка п'есы Яўгена Львовiча.

Такім чынам, можна павіншаваць з юбілеем тэатр «Жывое слова», калі завітаць на паказ спектакля «Цень» 26 сакавіка а 14-й у Малую залу БДПУ (500-ая аўдыторыя 2-га корпуса) па вул. Савецкая,18. Пасля выступленняў будзе магчымасць сустрэцца з удзельнікамі «Жывога слова».

Расскажи друзьям: Спектакль «Цень» да сусветнага дня тэатра і 55-годдзя калектыву