WI-FIСвяточны канцэрт напярэдадні Дня настаўніка быў прысвечаны вядомаму мовазнаўцу, педагогу і пісьменніку, бо менавіта Ф. Янкоўскі прыдумаў назву «Жывое слова» і прапанаваў яе Андрэю Андрэевічу Калядзе ў 1966 годзе. Да таго тэатр быў створаны А. Калядой спецыяльна для настаўнікаў ды і на філалагічны факультэт акцёра-купалаўца запрасіў выкладаць менавіта загадчык кафедры беларускага мовазнаўства Мінскага педагагічнага інстытута імя А.М.Горкага Фёдар Янкоўскі. Дарэчы, сёння на філфаку ўжо выкладаюць яго былыя студэнты.
Гісторыя працягваецца, і цяперашнія ўдзельнікі тэатра нясуць жывое слова гледачам. Яны падрыхтавалі шмат сюрпрызаў да адкрыцця 53-га тэатральнага сезону. Кожны глядач атрымаў цыдулку з унікальнай цытатай Янкоўскага, а таксама змог паглядзець канцэртную праграму, у якой прымалі ўдзел адны дзяўчаты. Гэта было зроблена наўмысна, бо тэатр зараз шукае хлапцоў на выкананне галоўных роляў у спектаклях, канцэртах і літаратурна-музычных кампазіцыях. Студэнткі з годнасцю выканалі мужчынскія ролі ў мініяцюрах на ўрачэбную, транспартную і, вядома, настаўніцкую тэматыку. Акрамя таго, гледачы пачулі шэраг прыгожых лірычных вершаў і вясёлых песень.
Кіраўнікі тэатра Алеся Сівохіна і Алесь Мойскі запрасілі гледачоў-першакурснікаў на наступную рэпетыцыю, каб стаць удзельнікамі «Жывого слова».
