WI-FIНа пасяджэнні прысутнічалі намеснікі дэканаў факультэтаў і намеснікі дырэктараў інстытутаў па навуковай рабоце, загадчыкі кафедраў, прадстаўнікі Савета маладых вучоных і Студэнцкага навуковага таварыства.
У пачатку пасяджэння А.І. Жук адзначыў, што навуковая, навукова-тэхнічная і інавацыйная дзейнасць БДПУ накіравана на павелічэнне навукова-даследчага патэнцыялу ўніверсітэта як вядучай ВНУ ў сферы бесперапыннай педагагічнай адукацыі, забеспячэнне апераджальнай падрыхтоўкі, павышэння кваліфікацыі і перападрыхтоўкі педагагічных работнікаў, а таксама ўстойлівае развіццё нацыянальнай сістэмы адукацыі.
З асноўным дакладам выступіла прарэктар па навуковай рабоце Святлана Мікалаеўна Фяклістава. Прарэктар адзначыла, што прафесарска-выкладчыцкі склад і навуковыя супрацоўнікі БДПУ паспяхова выканалі план навукова-даследчых работ.
Распрацоўваліся 95 НДР рознага ўзроўню: па мэтавым фінансаванні са сродкаў дзяржбюджэту па грантах Міністэрства адукацыі, БРФФД, навуковых праграмах; па бюджэтным фінансаванні ў другую палову працоўнага дня. Агульны аб’ём фінансавання навукі ў 2024 г. павялічыўся на амаль 20 тыс. руб. у параўнанні з папярэднім годам.
Найбольшую актыўнасць праявілі вучоныя філалагічнага факультэта, Інстытута інклюзіўнай адукацыі, гістарычнага і фізіка-матэматычнага факультэтаў.
Супрацоўнікі БДПУ прымалі ўдзел у выкананні ГНТП “Функцыянальная адукаванасць” (9 НДР) і 6 дзяржаўных праграм навуковых даследаванняў (31 НДР), каардынуемых НАН Беларусі. Пры падтрымцы БРФФД выконваліся 6 навуковых праектаў, па грантах Міністэрства адукацыі дактарантам, саіскальнікам і студэнтам – 6 НДР. Распрацоўваліся 3 НДР, накіраваных на навукова-тэхнічнае забеспячэнне дзейнасці Міністэрства адукацыі, а таксама 1 асобны праект.
Апрабацыя вынікаў завершаных НДР ажыццяўлялася ў рамках 8 рэспубліканскіх эксперыментальных і 7 рэспубліканскіх інавацыйных праектаў.
Асноўныя вынікі даследаванняў вучоных БДПУ знайшлі адлюстраванне ў 1919 публікацыях. У параўнанні з 2023 г. адзначаецца зніжэнне колькасці артыкулаў у часопісах ВАК на 2 %, павелічэнне колькасці артыкулаў у часопісах Scopus і Web of Science на 63 %, павелічэнне колькасці публікацый у выданнях з базы РІНЦ на 7 %. Артыкулы у часопісах Scopus і Web of Science падрыхтаваны ў Інстытуце інклюзіўнай адукацыі, на факультэце прыродазнаўства, Інстытуце павышэння кваліфікацыі і перападрыхтоўкі, у Інстытуце псіхалогіі, на фізіка-матэматычным і філалагічным факультэтах.
У 2023 г. у БДПУ праведзена 30 навуковых мерапрыемстваў, 18 з іх – міжнародныя.
Па выніках удзелу ў конкурсах на саісканне стыпендый Прэзідэнта Рэспублікі Беларусь аспірантам і таленавітым маладым вучоным на 2024 г. стыпендыя была прызначана двум аспірантам БДПУ (В.Г.Дзядовіч, А.У.Млёнік), а таксама двум маладым вучоным (І.М.Трасцян, В.І.Чэпікава). Уладальнікамі грантаў Міністэрства адукацыі Рэспублікі Беларусь на выкананне НДР дактарантамі, аспірантамі, саіскальнікамі і студэнтамі на 2023 г. сталі 6 чалавек.
Адбылося 7 абарон кандыдацкіх і доктарскіх дысертацый работнікамі БДПУ, з іх 4 – доктарскія (Т.Я.Старасценка, А.А.Лемех, Т.В.Даніловіч, А.В.Белая).
- На пасяджэнні перад структурнымі падраздзяленнямі былі пастаўлены канкрэтныя задачы па наступных кірунках:
- выкананне плана абарон кандыдацкіх дысертацый;
- павелічэнне колькасці атрымальнікаў грантаў Прэзідэнта Рэспублікі Беларусь у галіне навукі;
- павелічэнне колькасці вынікаў НДР, укаранёных у адукацыйную дзейнасць;
- павелічэнне колькасці публікацый, уключаных у базы Web of Science, Scopus;
- пашырэнне аб’ёмаў экспарту тавараў і паслуг у галіне навукі.
Поўны тэкст пастановы будзе накіраваны ва ўсе структурныя падраздзяленні ўніверсітэта.
