WI-FIНа пачатку пасяджэння рэктар А.І. Жук адзначыў, што выкарыстанне сучасных інфармацыйных тэхналогій у адукацыйным працэсе з’яўляецца адным з прыярытэтных кірункаў дзейнасці ўніверсітэта.
Дэкан фізіка-матэматычнага факультэта Сяргей Іванавіч Васілец у сваім выступленні паведаміў, што ў адпаведнасці з Канцэпцыяй інфарматызацыі БДПУ на 2015−2018 гады, рашэннямі Савета БДПУ ў адукацыйным працэсе на фізіка-матэматычным факультэце ўкараняецца дыстанцыйнае навучанне, прэзентацыйныя тэхналогіі, вікі-тэхналогіі, 3D-мадэляванне, дапоўненая рэальнасць, сэрвісы WEB 2.0 і інш. У якасці сеткавых тэхналогій выкарыстоўваюцца: лакальная сетка БДПУ, воблачныя тэхналогіі, сайты ўніверсітэта, факультэта, кафедраў, блогі выкладчыкаў, сістэма для правядзення вэбінараў Adobe Acrobat Connect, электронная пошта.
Акрамя падрыхтоўкі настаўнікаў інфарматыкі факультэт забяспечвае фарміраванне ІКТ-кампетэнцый будучых педагогаў на няпрофільных спецыяльнасцях іншых факультэтаў і інстытутаў. Па завяршэнні курса «Інфармацыйныя тэхналогіі ў адукацыі» студэнты абараняюць праект у галіне выкарыстання камп’ютарных тэхналогій у адукацыйным працэсе ў адпаведнасці са сваёй спецыяльнасцю. У 2018−2019 навучальным годзе пачаліся заняткі ў рамках факультатыву «Асновы візуальнага праграмавання і адукацыйнай робататэхнікі» для студэнтаў факультэтаў пачатковай адукацыі і дашкольнай адукацыі. На факультэце дашкольнай адукацыі пачала працаваць СНДЛ «Фарміраванне даследчых кампетэнцый выхавальніка дашкольнай адукацыі ў галіне прымянення інфармацыйна-камунікацыйных тэхналогій (ІТ-дзяцінства)» (кір. Г.Ф. Клімовіч).
Дакладчык адзначыў, што ў лістападзе 2017 г. пры садзейнічанні ААТ «Пріорбанк», ААТ «БайТэхСалюшн», ААТ «Сістэмныя тэхналогіі», Асацыяцыі па садзейнічанні развіццю адукацыйных ініцыятыў у галіне дакладных навук і высокіх тэхналогій «Адукацыя для будучыні» на фізіка-матэматычным факультэце быў адкрыты «Рэспубліканскі рэсурсны цэнтр адукацыйнай робататэхнікі» (РРЦАР). На базе рэсурснага цэнтра ў 2018 г. былі праведзены 6 курсаў павышэння кваліфікацыі па адукацыйнай праграме «Асновы адукацыйнай робататэхнікі для рэалізацыі праграм факультатыўных заняткаў», на якіх займаліся больш за 90 настаўнікаў школ і супрацоўнікаў БДПУ. Арганізавана звыш 50 экскурсій для школьнікаў, студэнтаў, настаўнікаў, замежных дэлегацый. У рэсурсным цэнтры навучэнцы гімназій г. Мінска вывучаюць асновы праграмавання і робататэхнікі.
На базе РРЦОР у жніўні бягучага года сумесна з Асацыяцыяй «Адукацыя ў мэтах устойлівага развіцця» прайшоў форум распрацоўшчыкаў праграмнага забеспячэння (хакатон) для школьнікаў. У лістападзе 2018 г. у рэсурсным цэнтры сумесна з асацыяцыяй «Адукацыя для будучыні» ў рамках круглага стала, прысвечанага праблемам STEAM-адукацыі, праведзены майстар-клас па робататэхніцы. У РРЦАР на працягу навучальнага года праходзяць вучэбныя заняткі па праграмаванні, робататэхніцы, методыцы выкладання інфарматыкі са студэнтамі фізіка-матэматычнага факультэта.
На базе РРЦАР арганізавана праца трох факультэцкіх СНДЛ («8 біт», «Дыдыктатрон», «Інфармацыйна-камунікацыйныя тэхналогіі ў адукацыі») і запланавана рэалізацыя актуальнага адукацыйнага праекту «Разумны дом» (распрацоўка кап’ютарызаванай інтэлектуальнай сістэмы функцыянавання будынку, якая падтрымлівае бяспеку, рэсурсазберажэнне і камфорт карыстальнікаў).
Па словах С.І. Васільца, на працягу 2017–2018 гг. фізіка-матэматычны факультэт сумесна з цэнтрам развіцця інфармацыйных тэхналогій, філалагічным факультэтам і факультэтам сацыяльна-педагагічных тэхналогій удзельнічае ў міжнародным праекце «Інавацыйная адукацыя ў сферы інфармацыйных і камунікацыйных тэхналогій для сацыяльна-эканамічнага развіцця» (IESED) праграмы Erasmus+. Па выніках праекту у вучэбныя праграмы спецыяльнасцей факультэта ўнесены змяненні, накіраваныя на выкарыстанне сучасных інавацыйных метадаў навучання, а ў вучэбныя планы ўключаны 6 новых факультатываў. На факультэце распрацаваны праект стварэння лабараторыі лічбавага мадэлявання фізічных працэсаў і абсталявання лекцыйнай аўдыторыі фізічных дэманстрацый (аўд. 102, 106, корп. 3). Плануецца стварэнне ўніверсітэцкага педагагічнага STEAM-парка, у склад якога ўвойдуць рэсурсны цэнтр адукацыйнай робататэхнікі, лабараторыя, планетарый, STEAM-цэнтр факультэта прыродазнаўства.
Дацэнт кафедры педагогікі Вераніка Мікалаеўна Пунчык, якая з’яўляецца выпускніцай фізіка-матэматычнага факультэта БДПУ, у сваім выступленні адзначыла, што менавіта на факультэце быў закладзены той трывалы падмурак, які з аднаго боку дазваляе ўпэўнена адчуваць сябе ў прафесійным аспекце, а з другога − забяспечвае шырокую платформу для бесперапыннай адукацыі. На яе думку, педагогіка ў педагагічным універсітэце мае асаблівы статус, яна з'яўляецца не проста інструментам і часткай сацыяльна-педагагічных тэхналогій, а выступае метадалагічнай падставай, агульным сістэмаўтваральным пачаткам усіх прыватных методык, пры гэтым не ўступае ў канкурэнтную барацьбу са зместам выкладаемых канкрэтных дысцыплін (матэматыкі, фізікі, геаграфіі, мовы і інш.). Менавіта гэтая метаідэя была закладзена ў аснову міжфакультэцкага студэнцкага адукацыйнага фестывалю «Педагагічныя магчымасці інфармацыйных тэхналогій», флагманам якога выступілі студэнты фізіка-матэматычнага факультэта. На ім былі рэалізаваны прынцыпы міждысцыплінарнасці, інтэграцыі, уключэння студэнтаў у сацыяльна важны працэс стварэння ўласных адукацыйных прадуктаў.
Па выніках міжфакультэцкага студэнцкага адукацыйнага фестывалю «Педагагічныя магчымасці інфармацыйных тэхналогій» 14 лепшых відэаролікаў з 40 прадстаўленых рэкамендаваны арганізатарамі для выкарыстання ў адукацыйным працэсе нашага ўніверсітэта і размешчаны ў відэарэпазіторыі БДПУ.
В.М. Пунчык падкрэсліла, што лічыць вопыт фізіка-матэматычнага факультэта па выкарыстанні сучасных інфармацыйных тэхналогій у адукацыйным працэсе пазітыўным і вартым пераймання.
Студэнтка 2-га курса фізіка-матэматычнага факультэта БДПУ Ксенія Цішкевіч падзялілася асабістым вопытам выкарыстання інавацыйных тэхналогій падчас паступлення ва ўніверсітэт і ў працэсе навучання. Яна адзначыла, што ўжо на першым курсе студэнты мелі магчымасць пазнаёміцца з працай рэсурснага цэнтра, дзякуючы чаму здолелі паспяхова авалодаць графічнымі рэдактарамі CorelDraw, Fotoshop і праграмамі для анімацыі і мадэлявання Flash, 3d Мах. Рэсурсны цэнтр дазваляе ў індывідуальным рэжыме прапрацаваць лабараторныя заданні, падрыхтавацца да заняткаў, выконваць разнастайныя разлікі, праводзіць даследаванні ў спецыяльным матэматычным асяроддзі.
Падводзячы вынікі абмеркавання пытання, А.І. Жук адзначыў, што ва ўніверсітэце створана неабходная інфраструктура для выкарыстання сучасных інфармацыйных тэхналогій у адукацыйным працэсе.
Разам з тым маюцца і нявыкарыстаныя магчымасці для паляпшэння якасці адукацыйнага працэсу за кошт развіцця сістэмы дыстанцыйнага навучання, распрацоўкі новых і мадэрнізацыі дзеючых вучэбных праграм. Неабходна актывізаваць выкарыстанне блогаў і асабістых кабінетаў прафесарска-выкладчыцкага складу, распрацоўку сучасных ЭВМК, палепшыць планаванне сцэнарыяў, запіс і размяшчэнне «залатых» лекцый вядучых выкладчыкаў універсітэта.
Па ініцыятыве рэктара БДПУ было прынята некалькі важных рашэнняў, накіраваных на пашырэнне выкарыстання сучасных інфармацыйных тэхналогій у адукацыйным працэсе ўніверсітэта.
Поўны тэкст пастановы Савета БДПУ будзе дасланы ва ўсе структурныя падраздзяленні ўніверсітэта.
