WI-FIУ 1960 годзе Віктар Уладзіміравіч скончыў Гомельскі дзяржаўны педагагічны інстытут імя В. Чкалава па спецыяльнасці «Руская і беларуская мова і літаратура», звязаўшы сваё далейшае прафесійнае жыццё з педагогікай.
Пасля заканчэння аспірантуры пры кафедры педагогікі Мінскага дзяржаўнага педагагічнага інстытута імя А.М. Горкага ў 1972 годзе абараніў кандыдацкую дысертацыю, у 1996-м − доктарскую. З 1997 года з’яўляецца прафесарам па спецыяльнасці «Педагогіка», акадэмікам Акадэміі педагагічных і сацыяльных навук Расійскай Федэрацыі.
Віктар Уладзіміравіч мае значны практычны вопыт. Ён працаваў настаўнікам нямецкай мовы, рускай мовы і літаратуры ў сярэдняй школе № 1 г. Слуцка, арганізатарам пазакласнай і пазашкольнай выхаваўчай работы гэтай установы адукацыі. Быў выкладчыкам, дацэнтам кафедры педагогікі і псіхалогіі Брэсцкага дзяржаўнага педагагічнага інстытута імя А.С. Пушкіна.
Стаць прафесіяналам высокага ўзроўню Віктару Уладзіміравічу дазволіла і адміністрацыйная работа на пасадзе загадчыка кафедры педагогікі і псіхалогіі згаданага інстытута, намесніка дырэктара на навуковай рабоце Навукова-даследчага інстытута педагогікі Міністэрства асветы БССР, загадчыка лабараторыі сямейнага выхавання, загадчыка кафедры педагогікі і псіхалогіі магістратуры Нацыянальнага інстытута адукацыі, прафесара кафедры педагогікі і псіхалогіі факультэта педагогікі і методыкі пачатковага навучання, прарэктара па навуковай рабоце Інстытута павышэння кваліфікацыі і перападрыхтоўкі БДПУ. Хутка будзе 13 год, як Віктар Уладзіміравіч працуе на кафедры менеджменту і адукацыйных тэхналогій ІПКіП БДПУ.
Вядомы вучоны, педагог, ён прайшоў шлях ад настаўніка да прафесара і заслужыў павагу і аўтарытэт педагагічнай супольнасці не толькі ў Беларусі, але і далёка за яе межамі. Спектр навуковых інтарэсаў Віктара Уладзіміравіча шырокі: ён з’яўляецца аўтарам навуковых работ па праблемах сямейнай педагогікі, патрыятычнага выхавання, сацыяльнай педагогікі, вышэйшай і дадатковай адукацыі, гісторыі педагогікі ў беларускім і замежным друку.
Віктар Уладзіміравіч вядзе актыўную грамадскую дзейнасць. З’яўляецца членам Нацыянальнай камісіі па правах дзіцяці, членам праблемнага савета па педагагічных навуках БДПУ, савета па абароне дысертацый Д 02.21.02 пры БДПУ, членам прэзідыума Навукова-метадычнага савета пры Міністэрстве адукацыі Рэспублікі Беларусь па навукова-метадычным і арганізацыйным забеспячэнні сацыяльна-псіхалагічнай і выхаваўчай работы, кансультантам рэдакцыйных калегій і саветаў часопісаў «Народная асвета», «Пралеска», «Выхаванне i дадатковая адукацыя».
Вялікая ўдзячнасць паважанаму Віктару Уладзіміравічу за плённую педагагічную дзейнасць у справе адукацыі і выхавання моладзі, павышэння прафесійнай кваліфікацыі педагагічных работнікаў і псіхолага-педагагічнай культуры навучэнцаў і іх бацькоў. Жадаем моцнага здароўя, дабрабыту, новых здабыткаў у працы і жыцці!
