Прадстаўнікі БДПУ ўзнагароджаны нагрудным знакам Міністэрства адукацыі «Выдатнік адукацыі»

Ірына Уладзіміраўна Шасцітка з 2015 года займае пасаду дырэктара Інстытута павышэння кваліфікацыі і перападрыхтоўкі БДПУ, а ва ўніверсітэте працуе з 2003 года. Высокі ўзровень кваліфікацыі, імкненне пастаянна павышаць сваю прафесійную кампетэнтнасць у галіне дадатковай педагагічнай адукацыі дазваляюць І.У. Шасцітка весці актыўную навукова-метадычную працу ў інстытуце. Яна з’яўляецца аўтарам вучэбных і метадычных дапаможнікаў з грыфам Міністэрства адукацыі Рэспублікі Беларусь.

І.У. Шасцітка актыўна ўдзельнічае ў навукова-даследчай рабоце, у тым ліку сумесна з расійскімі калегамі, актыўна выступае на канферэнцыях рознага ўзроўню з майстар-класамі. Распрацоўвае і прымае ўдзел у арганізацыі і правядзенні адукацыйных праграм павышэння кваліфікацыі спецыялістаў адукацыі. Пад кіраўніцтвам дырэктара IПКіП пашырыўся спектр напрамкаў навукова-даследчай дзейнасці слухачоў спецыяльнасцяў перападрыхтоўкі, абаронены звыш 30 дыпломных работ слухачоў.

За той час, як Ірына Уладзіміраўна займае пасаду дырэктара, у IПКiП актывізавалася міжнародная навукова-адукацыйная дзейнасць. У прыватнасці, па ініцыятыве інстытута ў БДПУ ў 2016-2017 гг. былі праведзены Беларуска-італьянскія фестывалі псіхалагічнага майстэрства з удзелам вядучых спецыялістаў. І.У. Шасцітка сумесна з калегамі ўдзельнічае ў міжнародных праектах па развіцці адукацыі ў краінах Усходняй Еўропы.

Таццяна Яўгенаўна Камароўская працуе ў БДПУ з 1995 года. Зараз займае пасаду загадчыка кафедры рускай і замежнай літаратуры філалагічнага факультэта БДПУ. З’яўляецца доктарам філалагічных навук.

Таццяна Яўгенаўна праводзіць значную вучэбна-метадычную работу. Яна распрацавала курсы па гісторыі замежнай літаратуры XІX ст. і аспектах літаратурнага твора і інш. Таксама з’яўляецца суаўтарам 3 вучэбна-метадычных дапаможнікаў па замежнай літаратуры. Удзельнічала ў распрацоўцы адукацыйных стандартаў новага пакалення і ў стварэнні новых вучэбных праграм па літаратуразнаўчых дысцыплінах.

Т.Я. Камароўская актыўна займаецца навуковымі даследаваннямі ў галіне замежнай літаратуры. Мае больш за 220 навуковых прац па фундаментальных праблемах літаратуры ЗША, апублікаваных у выданнях далёкага і блізкага замежжа (суаўтар Фолкнераўскай энцыклапедыі, выдадзенай у Уэстпорце, штат Канэктыкут, ЗША). Пад яе кіраўніцтвам паспяхова абаранілі кандыдацкія дысертацыі 10 аспірантаў і саіскальнікаў.

Сардэчна віншуем Ірыну Уладзіміраўну і Таццяну Яўгенаўну з узнагародай! Жадаем ім далейшых поспехаў на прафесійным шляху!