WI-FIСустрэча пачалася са знаёмства з народным калектывам у 500 аўдыторыі 2-га корпуса, дзе ўдзельнікі тэатра займаюцца ўжо 50 гадоў. “Жываслоўцам” было чым падзяліцца. Кіраўнікі Алеся Сівохіна і Алесь Мойскі распавялі пра гісторыю і сучаснасць тэатра, а пасля для сваіх студэнтаў і гасцей універсітэта правялі сумесную размінку, якая складалася з трэнінгаў на дыханне і артыкуляцыю, майстар-класаў на пастаноўку голаса і для развіцця маўлення. Студэнты з Масквы і Сахаліна актыўна ўключыліся ў разміначны працэс, жартавалі і праяўлялі акцёрскія здольнасці. У іх памяці, безумоўна, застануцца добрыя ўражанні ад сустрэчы і беларускія хуткамоўкі, якія яны развучылі пад час рэпетыцыі.
Пасля “жываслоўцы” паказалі канцэртную праграму, якая складалася з вершаў, мініяцюр і песень на беларускай мове, а госці спрабавалі падпяваць. Напрыканцы сустрэчы студэнты не спяшаліся разыходзіцца і абменьваліся пытаннямі пра свае ўстановы вышэйшай адукацыі, уражаннямі і эмоцыямі.
- Мы свядома пайшлі на эксперымент - і ўсю сустрэчу з расійскімі студэнтамі ўдзельнікі тэатра размаўлялі па-беларуску. Трэба адзначыць, што будучыя педагогі з Масквы і Сахаліна ўсё цудоўна разумелі: у іх не ўзнікала пытанняў, яны выконвалі ўсе заданні падчас трэнінгаў, смяяліся, дзе трэба, і пляскалі ў ладкі па заканчэнні канцэртнай праграмы, - падзяліліся ўражаннямі кіраўнікі «Жывога слова» Алеся Сівохіна і Алесь Мойскі.
