WI-FIСёлета ноч музеяў у купалаўскім музеі прайшла пад дэвізам «Будзь ЯК!» – будзь як Янка Купала: таленавітым і закаханым, стыльным і элегантным, маладым і крэатыўным. Дзяржаўны літаратурны музей Янкі Купалы запрасіў тэатр «Жывое слова» павіншаваць песняра з юбілеем у межах гэтай міжнароднай акцыі. Ноч музеяў ужо каторы год становіцца для тэатра «Жывое слова» добрай пляцоўкай для эксперыментаў. Тэатр з БДПУ ужо крэатывіў у мінулыя гады і праводзіў імправізаванае «вяселле» Янкі Купалы, у якім удзельнічалі і наведвальнікі музея, далучыўся да параду Паўлінак. У гэтым годзе таксама не абышлося без інтэрактыву, і «жываслоўцы» прапанавалі гледачам таксама паўдзельнічаць у іх канцэртнай праграме, прачытаўчы на памяць верш класіка. Наведвалькі музея з задавальненнем чыталі «Спадчыну», «Маю малітву», «І прыйдзе…», «Хто ты гэткі?...» і іншыя творы Янкі Кпалы.
«Жывое слова» ў сваю чаргу прапанавала наведвальнікам канцэртную праграму, якая складалася з лірычных песень і жартоўных мініяцюр, але рэфрэнам у канцэрце гучалі вершы лаўрэатаў Купалаўскай прэміі: Максіма Танка, Кандрата Крапівы, Рыгора Барадуліна, Ніла Гілевіча і іншых. «Жываслоўцы», якія толькі ў гэтым годзе далучыліся да тэатра, з задавальненнем пераўвасобіліся ў Купалу і ад яго імя прачыталі гумарэскі – жарты ад дзядзькі Янкі.
– Мы заўсёды адгукаемся на прапановы нашых літаратурных музеяў выступіць з праграмай па творах пісьменнікаў. Так, 25 мая мы ўжо запрошаны паўдзельнічаць у Дні памяці ў Літаратурным музеі Максіма Багдановіча. Паэта не стала 100 гадоў таму, і ўшанаваць яго памяць вялікі гонар для нас. Тым больш зусім нядаўна мы падрыхтавалі харавое чытанне вершаў Максіма Багдановіча, і з гэтай праграмай ужо выступалі на вялікай сцэне БДПУ, – распавёў кіраўнік тэатра Алесь Мойскі.
